A Pobra acolleu este 9 de xuño a presentación do seu programa de actividades para favorecer a conciliación familiar durante o verán, un programa que destaca pola súa flexibilidade (haberá catro quendas e servizo de madrugadoras/es) e pola variedade dos contidos incluídos (actividades lúdicas, culturais, deportivas e de xogo libre adaptadas a cada rango de idade).
Estes obradoiros Móvete desenvolveranse no CEP Salustiano Rey Eiras dende o día 23 de xuño ata 8 de setembro. Están destinados a nenos e nenas de 3 a 12 anos durante as vacacións do verán. Así o anunciaron o alcalde, Xosé Lois Piñeiro (Nós Pobra); a concelleira da Igualdade, Charo Varela (Nós Pobra); e o coordinador dos obradoiros, Rubén López.
Haberá catro quendas: a primeira será do día 23 ata 30 de xuño, por un importe de 15 euros; a segunda correspóndese con xullo, por 60 euros; a terceira, con agosto, por 60 euros; e a cuarta, co período comprendido dende o día 1 ata 8 de setembro, por 15 euros. Aplicarase un desconto do 50% á segunda irmá ou irmán e será de balde para o/a terceiro/a. Transcorrerán de luns a venres, en horario de 09.00 a 14.00 horas, con posibilidade de entrar ás 10.00 horas.
Ademais, haberá o Servizo de Madruga (con diferentes prezos dependendo de se o/a cativo/cativa entra a partir das 07.30 ou das 08.00 horas) e a prestación de comedor de 14.00 a 16.00 horas.
As prazas son limitadas e estipúlase o día 21 de xuño como data límite para formalizar a inscrición na primeira quenda a través da oficina de Deportes do Concello, situada na casa da cultura e xuventude Raquel Fernández Soler. As persoas interesadas poden solicitar máis información nos teléfonos de contacto 981 832 590 e 981 831 545, ou no enderezo electrónico deportes@apobra.gal.
Seguiranse as medidas implantadas por mor da COVID-19.
