A edición 2021 do certame Enreguéifate, co-impulsado polo Concello de Rianxo, recibiu 42 contribucións

O pasado 28 de maio rematou o prazo de inscricións para o certame Enreguéifate, que, como lembraremos, diríxese a botar man das novas canles de comunicación para reivindicar a tradición galega da regueifa. Foron presentados un total de 42 vídeos, que chegaron dende Ames, Baio, Cambre, Caldas de Reis, Santiago, Vigo, Mondoñedo, Rianxo, Pontevedra, Moaña, Malpica de Bergantiños, Ponteareas e Tordoia. Todas as improvisacións orais está dispoñíbeis na páxina web do certame e na súa canle de Youtube. Os vídeos premiados desta edición anunciaranse antes do 22 de xuño a través das redes sociais do Enreguéifate.

Neste momento comeza a fase de votación do xurado que nesta ocasión está composto por María López, concelleira en Teo e profesora; Manolo Maseda, mestre, músico e regueifeiro; Séchu Sende, mestre, escritor e regueifeiro; e A Rabela (rapeira, filóloga e regueifeira).

Como en cada edición, escollerán as contribucóns gañadoras de seis premios en cada unha das categorías: regueifa máis brava, máis aguda, máis diversa, máis reivindicativa, mellor cantada e mellor falada.

Os vídeos distinguidos nesta edición anunciaranse antes do 22 de xuño a través das redes sociais do Enreguéifate.

O certame é un proxecto impulsado polos concellos de Ames, Pontevedra, Rianxo, Santiago de Compostela e Teo que apoia a difusión da improvisación oral en verso (regueifa) para contribuír, por medio dela, á promoción do uso da lingua galega.

O obxectivo principal deste proxecto é “que a cidadanía entre en contacto coa improvisación oral en verso a través da experiencia de regueifar, nomeadamente no ámbito escolar”. Baixo este obxectivo, inclúe accións formativas e diferentes recursos audiovisuais (no Youtube) para alumnado e profesorado.