Había fame de saír ao mar: un desexo xeral de respirar aire libre e despexar a vista con horizontes abertos. O litoral da comarca ofrece neste senso múltiples posibilidades, e tanto os Concellos como as navieiras que operan na contorna, sábeno men. As opcións para coñecer o noso mar son este verán múltiples e variadas, pero nós centrarémonos nesta páxina nalgunhas das máis importantes e que nos tocan máis de preto.
Polo que se refire ás opcións en Ribeira, veñen da man das navieiras Cruceros do Ulla e Bahía Sub. Haberá, ao longo dos meses de verán, catro modalidades de ruta en catamarán con destino ao Parque Nacional Marítimo Terrestre das Illas Atlánticas de Galicia e á Ruta do Mexillón.
As saídas teñen lugar dende un peirao flotante posto a disposición por Portos de Galicia na zona de antiga lonxa e as visitas aos distintos destinos (illa de Sálvora, illa de Ons e a ruta do Mexillón) contarán coa asistencia de guías titulados.
-Ribeira–Illa de Sálvora. Navieira: Cruceiros do Ulla. Reserva e billetes: www.crucerosdoulla.com. Calendario: xuño (sábados), xullo (mércores e sábados), agosto (mércores e sábados) e setembro (sábado 7 e sábado 14). Horario: saída ás 10 e volta ás 14.30. Prezo: persoa adulta 20 €; crianzas de 3 a 12 anos 10 €; crianzas de 0 a 2 anos gratis.
-Ribeira–Illa de Ons. Navieira: Cruceiros do Ulla. Calendario: xuño (domingos 20 e 27), xullo (domingos) e agosto (domingos). Porto de embarque: Ribeira, antiga lonxa. Horario: saída ás 10.15 e volta ás 19.00. Prezos: persoa adulta 25 €; crianzas de 3 a 12 anos 10 €; de 0 a 2 anos gratis.
-Ribeira – Illa de Ons. Navieira: Bahía Sub. Máis información en www.bahiasub.com. Calendario: os sábados de xullo e agosto e en setembro, sábado 7 e sábado 14. O porto de embarque é a antiga lonxa. O horario de 10.00 a 18.00 horas. Prezo: persoa adulta 25 €; crianzas de 4 a 11 anos, 12,50 €; crianzas de 0 a 3 anos gratis. Inclúe degustación a bordo de mexillóns ou empanada con bebida.
-Ribeira – Ruta do Mexillón (con degustación a bordo). Navieira: Cruceiros do Ulla. Calendario: xuño (sábados), xullo (mércores e sábados), agosto (mércores e sábados) e setembro (sábado 7 e sábado 14). Porto de embarque: antiga lonxa de Ribeira. Horario: saída ás 17.30 e volta ás 18.45 horas. Prezo: persoa adulta 15 €; crianzas de de 3 a 12 anos 7€ ; crianzas de 0 a 2 anos gratis.
Polo que respecta á Pobra do Caramiñal, tamén será un porto referente para coñecer, por mar, a nosa importante contorna natural. Así, o Concello e a empresa Piratas de Nabia anunciaron que van organizar, por terceiro ano consecutivo, as visitas guiadas ao Parque Nacional Marítimo-Terrestre das Illas Atlánticas. Este mes de xuño están programadas dúas excursións a Sálvora e Ons, con saída dende A Pobra. A primeira cita foi o sábado 12 de xuño (unha excursión a Sálvora) e a segunda será unha singradura cara a Ons prevista para o domingo 27, a partir das 9:30 horas, cun prezo de 22 euros para adultos e de 13 euros para a rapazada ata 12 anos. Tódolos interesados poderán facer a súa reserva a través do teléfono 986 320 048 ou na web de Piratas de Nabia (www.piratasdenabia.com). As prazas son limitadas.
Polo que se refire a Rianxo, teremos este verán tres itinerarios. En primeiro lugar haberá un roteiro marítimo á illa de Ons, con datas o 20 de xuño e o 1 de agosto, e con saída ás 10.00 horas e regreso planificado ás 19.00 horas. Os prezos serán de 23 euros para adultos e 15 para crianzas.
A segunda das experiencias será unha ruta xacobea para coñecer Barbanza dende o mar, con saída o 25 de xullo, ás 10.00 da mañá. O prezo será de 30 euros para adultos e de 20 para nenos.
Polo que se refire á terceira proposta, a Ruta do Mexillón (O Ouro de Rianxo), está prevista en dúas quendas, o 7 e o 15 agosto, con dúas saídas por día. Os horarios serán os seguintes: pola mañá de 10.30 a 13.30 horas e pola tarde de 16.30 a 19.30 horas. O prezo será de 30 euros para adultos e de 20 para nenos.
As prazas serán limitadas, segundo confirmou o Concello (colaborador desta iniciativa), que fai fincapé na necesidade, para as persoas interesadas, de facer as súas reservas canto antes. O horario de atención telefónica será de 9.00 a 14.00 horas. Poderá solicitarse información a través do teléfono 981 866 225 ou 644 719 008.
No caso da Ría de Muros e Noia, o balandro Joaquín Vieta, histórico barco que pasa por ser o veleiro máis antigo de Galicia (foi construído na segunda década do século XX, entre o 1915 e o 1916 nun estaleiro do Freixo, en Outes), navegará a ría coma en anos anteriores. O contacto, para quen estea interesado en botarse ao mar no histórico veleiro é 639 720 631. Tamén se pode solicitar información a través de www.riademurosnoia.com.
