A ARE vén de solicitar ao Concello a inmediata recuperación do servizo de autobuses de Rianxo

En relación á finalización da concesión do servizo municipal de autobuses comunicada o pasado venres 18 a través
dun bando informativo polo Concello de Rianxo, desde a ARE (Asociación Rianxeira de empresarios) veñen de presentarlle un escrito reclamando unha solución, “de xeito urxente e prioritario, para restablecer un servizo imprescindíbel para os veciños das parroquias rianxeiras”.


A falta deste servizo, din, “provoca un forte agravio para os veciños residentes nas parroquias de Isorna, Leiro, Asados, Araño e Taragoña e, fundamentalmente para as persoas da terceira idade que precisan, decotío, deste servizo para acudir ao médico e a farmacia, ao banco, ao propio Concello ou a calquera dos servizos que este presta; pero tamén para a facer compras necesarias que xa non poden realizar nas súas parroquias, para comprar roupa e calzado, para ir ao salón de peiteado, ao dentista, ao fisioterapeuta, ao seu corredor de seguros, a correos… e, como non, para achegarse ao mercadiño os mércores. Sen este imprescindíbel servizo os ata o de agora usuarios terán que depender doutras persoas como fillos, netos ou bos veciños que traballan ou estudan e dispoñen de tempo limitado. Ou terán que utilizar o servizo de taxi, moito máis custoso e que normalmente xa utilizan para temas urxentes”.
E engaden: “Tamén haberá algúns veciños que si terán á súa disposición autobuses da compañía Mombús para ir a Boiro ou Padrón, o que sen dúbida aproveitarán para ir ata esas vilas veciñas a realizar compras, namentres os negocios de Rianxo seguen a ver como minguan os clientes e as ventas”.
No comunicado conclúen deste xeito: “Desde a ARE non podemos permitir que os negocios de Rianxo perdan clientela por non dispor dun servizo indispensábel. Tampouco entendemos como se chegou a esta situación. Si se coñecía que o servizo non rendía para as empresas que o ofrecían e que era necesaria unha modificación nas condicións para que ao menos non perdesen cartos ao prestalo, debeuse iniciar o proceso de renovación da concesión antes de dar por rematada a existente. Cremos que non se pode demorar o máis mínimo a solución necesaria para restablecer o servizo coa maior brevidade posíbel e por iso esiximos ao Concello de Rianxo que se tomen, de xeito inmediato, as medidas oportunas para corrixir este sen sentido”.