A programación cultural de Rianxo no mes de xuño comeza de cheo con libros entroncando en boa medida coa temática de boa parte das celebracións de maio, mes das Letras Galegas por excelencia. O venres 4, no Centro Sociocultural do Auditorio de Rianxo (Sala Arcos Moldes) ás 20.30 horas, está prevista a presentación do libro Os Rosales – O Son da Festa, da Editorial Canela. A cita contará coa presenza de Fina Fernández Fernández e Christian Castrelo (autores), Maruxa Miguéns e Xosé Romero (Os Rosales) e Adolfo Muíños Sánchez (alcalde de Rianxo).
Segundo adiantan os autores, trátase dun libro “que contén a historia de toda unha vida de loita e superación, cuxo motor recorrente foi e é unha constante paixón pola música tradicional, un relato que vai contemplando, paso a paso e dentro dun contexto espazo temporal, a traxectoria vital e profesional de Xosé Romero e Maruxa Miguéns, Os Rosales”.
A través da recreación de escenas achégase ao lector ás vivencias dos protagonistas no devir da súa traxectoria e, asemade, póñense de relevo os antecedentes, os inicios, a evolución e o carácter deste grupo rianxeiro.
Os Rosales, ademais, pasará á historia por ser unha agrupación na que se integrou unha muller, Maruxa, a comezos dos anos sesenta, e que facía o labor de presentar as pezas, cantar e tocar varios instrumentos de percusión, “sen dúbida algo excepcional na época na que o grupo andou espallando por tantas romarías e festas o seu particular son”, engaden os autores e máis a editorial.
A entrada á presentación será de balde, con reserva previa de localidades ata as 12:00 h do xoves 3 de xuño, a través de formulario na web municipal (preferente), ou no telf 981 100 688. É necesario indicar, de todas as persoas para quen se solicita: nome completo, telf e se son conviventes. A reserva será efectiva unicamente cando se confirme desde o auditorio.
