Os socialistas de Noia piden ao Concello que axuste a sinalización nas rúas ao novo regulamento en vigor

O grupo Socialista de Noia vai solicitar por escrito no vindeiro pleno e a través dun rogo que “se axilice a instalación de sinais de tráfico” e “se tomen as medidas necesarias para axustar a sinalización nas rúas do municipio e cumprir coa reforma do regulamento xeral de circulación, que entrou en vigor o pasado 11 de maio”.

Os socialistas lembran no seu comunicado que no mes de outubro presentaron unha moción para “mellorar a seguridade viaria na vila, na que se solicitaba ao Goberno municipal que se revisaran os pasos de peóns, e se estudase a posibilidade de reducir a velocidade a 30 Km/h nalgunhas rúas para que tivesen prioridade as persoas diante dos vehículos a motor”.

Os socialistas indican que os responsábeis municipais “vense agora na obriga de cumprir co novo regulamento de tráfico que limita a velocidade en vías urbanas a 30 quilómetros por hora, e despois de entrar en vigor, aínda non se realizou ningún cambio, nin información, na sinalización do municipio”.

Por todo isto, piden que se fagan as xestións “no menor tempo posíbel”, para mellorar a seguridade viaria, e que os condutores dispoñan de toda a información cos cambios que se produciron.

O portavoz socialista, Roberto Iglesias, indica que “unha vez máis, o Goberno actual vai por detrás da realidade, e demostra unha total falla de previsión cando despois da entrada en vigor do novo regulamento non se realizou ningunha modificación na sinalización da nosa vila”.

Asemade, o partido socialista vai pedir ao Goberno de Noia que realice unha campaña nas redes do Concello, lembrando a veciñanza a obrigatoriedade de limpar as fincas situadas preto das vivendas antes do 31 de maio, e cumprir coa Lei de prevención de incendios.