Rianxo será estes días un fervedoiro literario, coincidindo co mes de maio e a celebración do 17. O día 15 ás 19.30 horas, sen ir máis lonxe, o salón de actos do Centro Sociocultural-Auditorio de Rianxo vai dar acubillo á presentación do libro do poemas Hemisferio auga, do escritor rianxeiro José Carou Rey, que participará no acto xunto con Salvador Laíño (ilustrador) e Adolfo Muíños Sánchez (alcalde de Rianxo).
Amais, haberá unha lectura de poemas a cargo do escritor Anxo Muíños. Hemisferio auga é un poemario editado por Medulia que é un tributo á auga en todas a súas feituras e dimensións (bágoa, mar, chuvia, música, eixo condutor destes poemas). En palabras da editorial, o poemario vén sendo unha “sorte de caderno de bitácora doído polo desamor”.