O PSdG-PSOE de Noia vén de anunciar que solicitará melloras de seguridade na ponte do Campo de Noia. En concreto, pedirá que se substitúan as varandas metálicas de protección (quitamedos) instaladas recentemente por mor da obra da rotonda do peirao.
O grupo entende que “en troques de instalar uns novos quitamedos, a obra que se está a realizar a día de hoxe debera aproveitar para instalar outro sistema menos perigoso, tanta para as persoas que utilizan a ponte a pé, como para as bicicletas ou motocicletas que cruzan pola estrada, sendo un lugar moi transitado para ir as praias ou ben cara a Boiro”.
Os socialistas sinalan que estes dispositivos de seguridade estanse a retirar en múltiples estradas por todo o territorio nacional, “polo perigo que supoñen en caso de accidente”.
Tamén lembran que estes avisos sobre os problemas de seguridade na ponte xa veñen de antigo, xa que o propio grupo alertou en varias ocasións “do mal estado no que se atopa actualmente a construción sobre o río que conecta co Campo de Noia, onde as varandas presentan un estado de corrosión moi elevado, e onde a altura dos quitamedos, cos bordos cortantes, é moi perigosa no caso de que haxa unha caída, nunha ponte por onde transita unha gran cantidade de persoas”, explican.
O voceiro Roberto Iglesias, explica que “co tempo que leva a obra desta rotonda, que xa é denominada a rotonda eterna, consideramos que se puideron estudar outras alternativas máis estéticas co entorno histórico, e sobre todo, máis seguras para as persoas que cruzan a ponte a diario”.
