O Grupo Municipal Partido Barbanza Independente (PBBI), por medio do seu portavoz Vicente Mariño de Bricio, presenta un rogo ao pleno da Corporación de Ribeira relativo á desprotección na que se atopan a día de hoxe os nosos mariñeiros embarcados con respecto á COVID-19. No rogo, a agrupación fai un chamamento ao Concello para que “inste á Administración competente a proceder de maneira inmediata a vacinación de todos os mariñeiros e profesionais da frota galega para que queden inmunizados e se eviten riscos futuros como os que levaron ao contaxio dos tripulantes dun pesqueiro do cerco con porto base en Aguiño”.
Segundo lembra a agrupación, o colectivo de traballadores dos nosos buques pesqueiros “teñen a dificultade engadida respecto doutros sectores profesionais como a imposibilidade de manter as distancias de seguridade a bordo e, ademais, participan na realización de mareas de varias semanas de duración sen poder recibir atención sanitaria e as prolongadas estadías en alta mar limitan a súa dispoñibilidade para acudir á subministración da vacina”.
O PBBI recorda que esta petición non é unha cuestión que se limite ao ámbito político, posto que son os propios tripulantes os que están a demandar que o Goberno de España proceda á vacinación de todos e cada un dos profesionais que están enrolados nun barco ou que teñen previsto facelo “para que poidan estar inmunizados e evitar situacións como a que se acaba de producir co referido brote en Aguiño”. A agrupación tamén fai saber que ao colectivo lles “é indiferente quen lles vacine”, xa sexa o Instituto Social da Mariña (ISM), que é a autoridade competente en materia de sanidade marítima en España, ou a Consellería de Sanidade, para o que é necesario que o Ministerio de Sanidade dea as ordes precisas para que o proceso de vacinación comece de contado.
