O Concello de Ribeira está tomando as medidas legais oportunas en orde a denunciar a un cidadán do municipio polas graves expresións escritas nas redes sociais contra Ana Ruiz Reiriz, a edil da Corporación que onte anunciou a súa dimisión tras a celebración o sábado pasado dunha festa por parte de 24 rapaces, o seu fillo entre eles, nun local en Bandourrío do que é co-propietaria.
O individuo en cuestión —que tras proceder á súa identificación resulta ser un veciño de Deán de 51 anos— escribiu presuntamente os seguintes comentarios a dúas noticias aparecidas en Facebook: “Que a maten a pedradas, ostia pa tipeja.” e “Podían empezar por colgala do balcón do ayuntamiento xa que a palmera xa non está.”.
Os servizos xurídicos do Concello estudan denuncialo por ameazas e por expresións que incitan ao odio e a violencia contra unha muller que, a xuízo do equipo de goberno, vén de ofrecer un exemplo de responsabilidade pouco común na política ao recoñecer o seu erro e presentar voluntariamente a súa dimisión.
