O Lustres Rivas de Ribeira é esta tempada un fervedoiro de actividades culturais e creativas. Este mes de maio, amais do programa das Letras Galegas propiamente dito e a xeito de complemento da exposición Cinco artistas do Barbanza, as dependencias acollerán unhas xornadas culturais arredor dos catro creadores contemporáneos presentes na devandita mostra (do que tamén forma parte Castelao). Estamos a falar de Soledad Penalta, Xoán Fernández, Manuel Ayaso e Alfonso Costa.
As xornadas veñen da man do Concello, que fai saber que este xoves 20 de maio, ás 20.30 horas, está prevista unha charla sobre a escultora Soledad Penalta a cargo de Juan Monterroso Montero e, a continuación, Xosé Antonio Ventoso Mariño falará sobre o pintor Xoán Fernández.
Unha semana máis tarde, o xoves 27 ás 20.30 horas, Manuel Cartea disertará sobre Manuel Ayaso e Eva Veiga sobre Alfonso Costa.
O aforo estará limitado a 20 asistentes. Será imprescindíbel reservar con antelación enviando un correo a culturaefestexos@ribeira.gal indicando nome, apelidos, número de asistentes e teléfono de contacto.
Colaboran a Fundación Museo de Artes e a Asociación Barbantia.
