O BNG de Ribeira trasladará as peticións para mellorar o firme, a iluminación e limpeza dos aparcadoiros

O BNG de Ribeira trasladará as peticións veciñais para mellorar o firme, a iluminación e limpeza dos aparcadoiros. De feito, Pérez Barral denuncia que os terreos alugados teñen fochancas, carecen de iluminación e están cheas de lixo.

Segundo a formación, “non fai falta máis que ver os aparcadoiros, para apreciar que é necesario, mellorar o seu firme, rozar a vexetación, retirar os cascallos de obra e o lixo que teñen, así como mellorar a súa iluminación”. Na mesma liña, Luís Pérez Barral, sinala que “para que os aparcadoiros sexan unha alternativa onde deixar o coche, hai que terlle un firme axeitado evitando que sexan unha lameira os días de chuvia e unha zona de terra e po no verán”.

Ao mesmo tempo, o concelleiro nacionalista remarcou que “ante as declaracións feitas por Ruiz nos días pasados, o Bloque oporase á súa privatización e defenderá a xestión pública do Centenario para poder poñelo a disposición da veciñanza con tarifas reducidas e bonificacións para aquelas persoas que merquen no comercio local”.