O Bloque Nacionalista Galego de Ribeira vén de facer unha proposta para axilizar, no concello, a consecución de dous importantes proxectos: por unha banda a sede do Club de Remo, e pola outra a nova Biblioteca Municipal (no histórico inmóbel coñecido como Casa Gran Sol, na rúa de Galicia). Segundo sinala a agrupación, “cumpriría destinar un millón de euros para o seu desbloqueo”.
O BNG lembra que Ribeira conta actualmente cun Club de Remo desde xuño do ano 2013 e “desde aquel ano até a actualidade foron moitos os problemas que tiveron que afrontar incluíndo varias mudanzas de localización mais sempre foron aumentando o número de remeiras e remeiros”. Amais, engade a agrupación, “incrementouse o número de persoas socias e remeiras, até chegar a arredor dunhas 200, e estanse a acadar importantes trofeos como o de Campioas da Liga Galega de traíñas e terceira posición xeral na Bandeira da Concha en 2018, primeiro posto na Bandeira de Campioas de España, subcampionato Galego, subcampionato de España, subcampionato da Deputación, Bandeira Teresa Herrera e a clasificación como único equipo Galego na Bandeira da Concha coa sétima posición”.
Na súa opinión, “no concello de Ribeira debéranse fomentar os deportes náuticos, tal e como se fai noutras localidades, onde apostan firme por dotar os seus clubs de boas instalacións deportivas nas que se fomenta a actividade deportiva” agregou o concelleiro Luís Pérez Barral, engadindo que este baleiro de instalacións axeitadas no que se refire ao Club de Remo “contrasta co amplo catálogo de infraestruturas para os deportes terrestres e acuáticos (piscina, ximnasio, pavillón, campos de fútbol, circuíto pump truck e en breve cun módulo cuberto de atletismo)”.
A Biblioteca Municipal
O BNG recorda tamén a importancia de impulsar o proxecto da nova Biblioteca Municipal, “un servizo público de existencia obrigatoria especificada na lexislación e malia isto, o concello de Ribeira non conta cunhas instalacións axeitadas pois o espazo actual comparte espazo de lectura, aula para o estudo, sala de informática e espazo para celebración de actividades”. E engaden: “Desde o BNG entendemos que a falta de espazo para acoller diversas salas nas que dividir as súas actividades provoca serias molestias ás persoas que empregan este servizo público, ademais a súa localización enriba dun local con actividade musical tamén provoca ruído que molesta ás persoas usuarias”.
Os nacionalistas apuntan a que estes dous proxectos, a sede do Club de Remo e unha nova Biblioteca, “ían ser financiadas coa venda do matadoiro municipal, cuestión que foi obxecto de debate en múltiples ocasións e confirmada por parte do Goberno local a través do alcalde e da tenente de alcaldía en diferentes sesións plenarias”.
O BNG critica o labor do Concello pois considera que segue a manter “bloqueados estes dous proxectos”.
Por estes motivos, a agrupación pide aos grupos da Corporación que aproben a proposta de destinar 1 millón de euros para a construción da sede do Club de Remo (600.000€) e a nova Biblioteca Municipal (400.000€) mediante un crédito extraordinario que desbloquee “a actual parálise provocada polo Partido Popular”.
