O aparcamento municipal de Boiro pechará polas tardes a vindeira semana para a execución de obras

O Concello de Boiro vén de informar de que o aparcamento municipal ficará pechado polas tardes a vindeira semana para a a execución das obras de mellora e mantemento no Mercado Municipal, coas que tamén se vai actuar sobre o estacionamento da praza de Galicia que dá servizo a dito mercado.

As tarefas previstas nas instalacións do aparcamento contemplan a dotación de pérgolas nos accesos para a protección da choiva tanto na entrada como na saída e, tamén, para facilitar o acceso de peóns e evitar a entrada de auga da choiva nas instalacións.

Aproveitando que a instalación vai estar pechada para que os operarios poidan traballar, o Concello de Boiro vai levar a cabo outras tarefas de mantemento e limpeza xeral da instalación que non se poden realizar con facilidade cando as instalacións están en uso.

En concreto, pechará entre o martes día 18 e o venres día 21 en horario de tarde, a partir das 15.00 horas, para que os operarios poidan realizar os traballos previstos nos dous accesos e tamén levar a cabo tarefas de limpeza xeral da instalación.