O alumnado do IES Leliadoura visita este venres as mostras artísticas de Ribeira

Este 28 de maio, ás 12.00 e ás 12.45 horas, celebraranse unha serie de visitas organizadas de alumnado do IES Leliadoura ás exposicións Xuventude Crea (no Mercado Municipal) e 5 artistas do Barbanza (no Centro Cultural Lustres Rivas).

A mostra 5 Artistas do Barbanza

Así, ás 11.50 do venres recibiranse 2 grupos de alumnos e alumnas do IES Leliadoura na entrada do Mercado Municipal, para alí dividilos e visitar as dúas exposicións temporais, cunha duración de 40 minutos cada visita.

Na visita a Xuventude Crea. Máis dunha década, no primeiro andar do Mercado Municipal, a comisaria da exposición, Alexandra R. Rey, recibirá o grupo e impartirá unha charla para dar a coñecer o proxecto Xuventude Crea e o contido da exposición, na que participan 29 artistas de diferentes disciplinas como unha pequena representación dos máis de 500 premiados e premiadas ata o de agora neste certame convocado pola Consellería de Política Social desde hai máis dunha década. Ás 12.45 recibirá o seguinte grupo.

A exposición Xuventude Crea

Na visita a 5 autores do Barbanza, no Centro Cultural Lustres Rivas, introducirase o alumnado visitante na importancia da creación na nosa comarca, con obras de Xoán Fernández, Manuel Ayaso, Alfonso Costa, Soledad Penalta e Castelao.

Ao rematar intercambiarán os espazos para que todo o alumnado poida visitar as dúas exposicións.