O próximo venres 18 de xuño presentarase a novela Romanza de los naranjos en Flor, de Juan Galan. O acto, que se enmarca no programa Xuño Cultural 2021, terá lugar na Sala Arcos Moldes do Centro Sociocultural, ás 20:30 horas. Nesta ocasión estarán presentes Carlos de Jesús Cimadevila, profesor e activista sociocultural, e Adolfo Muíños Sánchez, alcalde de Rianxo.
Romanza de los naranjos en flor ten lugar durante a Guerra Civil Española. A obra é unha combinación dunha novela histórica e unha novela de intriga. Por iso, conta cunha estrutura complexa, con varias voces narrativas, saltos no tempo adiante e atrás, e inclúe, ademais da narración e os diálogos, entradas nun caderno como diario, cartas, reportaxes e noticias xornalísticas.
A novela narra a a historia de dous personaxes, Alfonso Castro Weiss, falanxista coruñés, avogado e fillo dun republicano nado en Ferrol, e Miguel Artimes Llana, violinista de Oviedo afiliado ao C.N.T. Ambas vidas transcorren en paralelo, sen que exista ningunha ligazón entre elas, ata que, nun momento determinado da trama, acaban xuntándose no campo de concentración do mosteiro de Oia (Pontevedra). Dita obra sufriu a sublevación militar do 36, a guerra e a represión. Así, describe a dureza das condicións do cárcere, aínda que tamén hai espazo para o amor, a música, a solidariedade, o humor e a amizade entre persoas de bandos opostos.
As localidades poderanse reservar ata o día anterior da representación na páxina web do Concello ou a través do número de teléfono 981100688. Os solicitantes deberán proporcionar o nome completo e o seu teléfono de contacto.
