A xerente de Solo Empresarial do Atlántico (SEA), Beatriz Sestayo, desprazouse este 7 de maio a Rianxo para coñecer un dos últimos proxectos en sumarse ao parque empresarial da localidade, un dos 13 que xestiona en Galicia a entidade. Trátase da empresa de produtos pesqueiros e sustentábeis Frigoríficos Mar dá Pobra, que iniciou a construción dunha nave na que prevé comezar a operar a finais deste ano, cun persoal inicial de 5 persoas que se ampliaría progresivamente ata os 25 empregados. Na visita estivo acompañada do alcalde rianxeiro, Adolfo Muíños.
A compañía instálase nunha parcela de 1.125 metros cadrados, adquiridos a finais de 2020 á entidade SEA. Desta forma, Beatriz Sestayo explicou que “proxectos como este reflicten o valor “estratéxico do polígono de Rianxo e da comarca, nun sector tradicional en Galicia”.
Doutra banda, tamén lembrou que o Polígono de Rianxo triplicou nos últimos anos a súa ocupación, alcanzando case o 70%, tras operacións como a pechada con Conservas
Cerqueira, en máis de 36.000 metros cadrados ou Mar da Pobra. Ao fío desta cuestión, o alcalde Adolfo Muíños explicou que “o obxectivo é analizar con calma a posibilidade de incorporar novos terreos ao polígono para que ningunha empresa fique fóra”. Ademais, lembrou que “o Concello incentiva a instalación a empresas ao bonificar tanto o ICIO como o IBI”.
O responsábel da devandita empresa, Pablo Fernández, asegurou que “a súa actividade centrarase en transformar as capturas da pesca artesanal galega en produtos ultra conxelados pero potenciando a sustentabilidade”. A instalación supoñerá un investimento total de 700.000 euros.
En xeral, o Polígono de Rianxo conta con superficie bruta de 317.728 metros cadrados e neta de 200.156. Actualmente, son 18 as empresas que adquiriron solo para desenvolverse. Entre elas destacan Conservas Cortizo, Mar da Pobra, Proafer, Tarrío y Suárez, Metales Taragoña ou La Cambra.