Este mes de maio proseguen en Noia os traballos para acondicionar infraestruturas e diversos elementos municipais do concello, tanto dende o punto de vista estético como dende o funcional. Neste senso, foron intensos os traballos para engalanar edificios e zonas verdes levados a cabo pola Concellería de Parques e Xardíns que dirixe Ana García.
En concreto, cambiáronse as decoracións florais na praza das Angustias, nos xardíns de Felipe de Castro, na praza das Américas e no balcón do Concello, entre outros emprazamentos do termo municipal.
Ademais leváronse a cabo reparacións dalgúns dos bancos do paseo marítimo.
No ámbito máis funcional, o Concello tamén explicou que estes días de mediados de maio deron comezo as obras para renovar e acondicionar as beirarrúas do Obre, na súa marxe dereita. Segundo informou o Goberno local, esta actuación vai dirixida a optimizar a accesibilidade e a seguridade na estrada principal que cruza a devandita parroquia. Neste treito tamén se vai proceder á colocación de canalizacións.
Estas actuacións supoñen un investimento de 90.000€, que “se verá reforzado con outras melloras que darán comezo nos vindeiros meses”, engadiu o Concello.
