O Centro Social de Cabo de Cruz acolle durante o mes de maio a exposición de fotografía da artista Elena Aycart e que leva por título Madagascar: a illa única. O Concello confirmou que poderá visitarse na sala de exposicións do Centro Social de Cabo a partir deste mércores día 5 de maio. A concelleira de Cultura, María Outeiral, visitou a mostra acompañada da artista.
Segundo indicou a autora das fotografías, este proxecto foi inspirado pola Sociedad Geográfica Española e a escritora Enma Lira, redactora de guías Lonely Planet e colaboradora de National Geographic.
A mostra está composta por 28 fotografías nas que se resalta a singularidade do país africano dende o punto de vista estético e que convidan á reflexión sobre os seus desafíos e oportunidades de cara ao futuro.
A mostra inaugurouse na Pobra do Caramiñal e agora trasládase a Cabo de Cruz, onde estará exposta dende o día 5 de maio e ata finais de mes. A mostra poderá visitarse de luns a venres en horario de 10.00 a 14.00 horas e de martes a xoves tamén de 16.00 a 19.00 horas.
