Boiro executa obras de asfaltado en Pumar do Río con cargo ao POS provincial

O Concello de Boiro está a executar estes días as obras de mellora do firme nuns tramos de rúa no lugar de Pumar do Río. Unha actuación enmarcada dentro do proxecto de renovación de pavimentos en Pumar do Rio, Cadarnoxo, Carboeiro, Enseño e Cures que o Concello de Boiro executa con cargo ao Plan de Obras e Servizos da Deputación da Coruña por importe de 73.235,43 euros.
Os tramos que se contemplan neste proxecto para a súa renovación presentan deficiencias no pavimento indicativas do deterioro do firme, así como algunhas deficiencias na rede de captación de pluviais. O pavimento existente
presentaba gastos excesivos para a súa conservación ordinaria, polo que era preciso unha rehabilitación superficial para conservar e mellorar as súas características funcionais de seguridade e comodidade.
A actuación que se está a realizar neste momento en Pumar do Río, nun tramo que une a zona de xogo dos bolos e a pista do monte dunha superficie duns 290 metros cadrados, precisa dunha reconstrución completa polo que se
opta por un firme de formigón. Ademais, estase a realizar unha correcta separativa da rede de pluviais e a rede de saneamento.