O Concello de Ribeira vén de anunciar a adxudicación con carácter provisional da actuación consistente na construción de beirarrúas e instalación de pluviais na estrada DP-7307 ao seu paso polo lugar da Ameixida.
As obras serán realizadas por Excavaciones Nima, S.L., logo de obter a puntuación máis alta entre as 27 ofertas presentadas. A proposta conforma un total de 52.848 euros, que serán investidos para dotar á estrada DP-7307 de beirarrúas e así mellorar a seguridade dos peóns.
Así, a iniciativa incluirá unha marxe esquerda de 400 metros de beirarrúas, ademais dunha rede de pluviais a través da instalación dunha tubaxe de PVC. A actuación, que está enmarcada na Segunda e derradeira fase do Plan Provincial de Cooperación ás Obras e Servizos Municipais, terá un prazo de execución de mes e medio.
