Axentes da Policía Nacional adscritos á Comisaría de Ribeira veñen de deter unha muller de 26 anos, veciña de Ribeira, por un presunto delito contra a saúde pública, na súa modalidade de tráfico de drogas.
Os feitos tiveron a súa orixe na madrugada do pasado mércores, cando unha radio-patrulla Zeta da Policía Nacional procedeu a controlar un vehículo que circulaba polo centro urbano de Ribeira dadas as limitacións de movemento debido ás medidas sanitarias antiCOVID. O seu catro ocupantes, ao non dar motivos suficientes para xustificar a súa estancia en vía pública a tales horas, foron propostos para sanción administrativa.
Durante a intervención, comprobouse que a muller levaba unha bolsiña cunha sustancia que “podía ser cocaína, oculta no lateral do interior do pantalón, á altura da cintura”.
Unha vez feitas as comprobacións, os axentes constataron que a sustancia era, efectivamente, cocaína, cun peso de 13,2 gramos. A continuación procederon á detención da muller “por un delito contra a saúde pública”. Á detida cónstanlle antecedentes por feitos similares.
Tras tramitarse as correspondentes dilixencias policiais, a muller foi posta a disposición do Xulgado de Instrución de Ribeira, en funcións de garda.
