O Concello de Ribeira fixo balance das candidaturas presentadas á oitava edición do Concurso Internacional de Novela Curta Cidade Centenaria de Ribeira. Segundo fixo saber, presentáronse ao certame 29 obras literarias, o “que supón unha cifra récord de participación dende a primeira edición deste certame, en 2006”.
O concurso xa está “visto para sentencia” logo da última reunión dun xurado que está composto por Xoán Xosé Fernández Callón (bibliotecario e historiador), María Jesús Blanco López (mestra e escritora), María Canosa Blanco (escritora), Alicia Padín Otero (normalizadora lingüística de Ribeira e coordinadora da Rede de Dinamización Lingüística de Galicia) e Sara García Sampedro, como secretaria do xurado, con voz pero sen voto.
O próximo venres 21 de maio ao mediodía está previsto dar a coñecer a identidade da persoa gañadora deste concurso, dotado dun premio de 3.000 euros e a publicación da obra galardoada en edicións Xerais.
Na última edición gañou o ribeirense Antonio Piñeiro coa súa novela Celada. Antes foron distinguidas Begoña Paz (con As mellores intencións, Ignacio Silva (Vertixes), Goretti Fariña (Orlando pendurado), David Pobra (Liña azul), Amadeo Cobas (A cacería) e Antonio Tizón (Un home estraño).
