A ferrolá Irene Montero gaña con Lúa nova a oitava edición do Concurso de Novela Curta de Ribeira

Este 21 de maio deuse a coñecer o nome da persoa gañadora da oitava edición do Concurso de Novela Curta Cidade Centenaria de Ribeira. Trátase de Irene Montero, que se impuxo coa obra Lúa nova.

Así se deu a coñecer no salón de plenos do Consistorio nun acto que estivo presidido polo alcalde Manuel Ruiz e contou tamén coa participación de Fran Alonso, director de Edicións Xerais; da concelleira de Cultura, Maria Sampedro; da propia autora e de varios membros do xurado, entre outros.

Irene Montero, xornalista ferrolá afincada no municipio de Oleiros, agradeceu ao Concello e a Xerais a organización deste premio e confesou que esta é a súa primeira novela e tamén o primeiro premio ao que se ten presentado. Tamén fixo saber, respecto do galardón convocado por Ribeira, “que este tipo de iniciativas son imprescindíbeis para poñer en valor a nosa lingua”.

A protagonista da novela é Lúa Lóngora, cega de nacemento, inspirada nunha moza de Santa Cruz chamada Natalia á que Irene coñece e admira. “Natalia agora ten 16 anos e a miña Lúa 34, porque eu quería facer unha proxección cara adiante e imaxinar como será a súa vida, como se enfrontaría aos retos que se lle presenten, que decisións irá tomando”, afirmou a autora.

Unha reflexión sobre a discapacidade

Tamén incidiu en que quería falar da discapacidade, “non como unha historia de superación senón para facer unha reflexión sobre a propia discapacidade e sobre a relatividade do termo”. E engadiu: “En moitas ocasións, e sempre que esa persoa poida dispoñer dos recursos que precisa ao seu alcance, esa discapacidade vén acompañada doutras capacidades extraordinarias, que poden facernos discapacitados ao resto”.

Fran Alonso mostrouse a súa ledicia por “incorporar unha nova voz ao catálogo de Xerais” en tanto que o alcalde Manuel Ruiz agradeceu a súa participación, felicitou á autora polo premio e loou a temática abordada na creación literaria: “Non só ten argumento, senón tamén contido”, dixo.

Case unha trintena de propostas presentadas

A edil María Sampedro resaltou que nesta oitava edición presentáronse 29 obras, cifra récord que consolida a traxectoria do certame. Ademais reflectiu os valores recollidos na acta do xurado, que sinala que “a obra escollida destaca pola súa escrita fluída e fresca, cunha temática social que invita á reflexión por parte do espectador. A autora amosa un profundo coñecemento do asunto que trata artellando unha narración dende dúas ópticas diferentes”.

Lúa Nova será publicada en edicións Xerais en virtude do convenio de colaboración subscrito co Concello, ademais de estarmos ante un premio dotado de 3.000 euros. Os anteriores gañadores no Cidade Centenaria de Ribeira foron Begoña Paz (con As mellores intencións), Ignacio Silva (Vertixes), Goretti Fariña (Orlando pendurado), David Pobra (Liña azul), Amadeo Cobas (A cacería), Antonio Tizón (Un home estraño) e Antonio Piñeiro (Celada).

O xurado nesta oitava edición estivo composto por Xoán Xosé Fernández Callón (bibliotecario e historiador), María Jesús Blanco López (mestra e escritora), María Canosa Blanco (escritora) e Alicia Padín Otero (normalizadora lingüística de Ribeira e coordinadora da Rede de Dinamización Lingüística de Galicia), actuando como secretaria (con voz pero sen voto) Sara García Sampedro.