A pasada semana, o venres, celebrouse en Noia un encontro para compartir experiencias e coñecemento arredor do que se coñece como sustentabilidade: novos (pero antigos) xeitos de producir e xerar riqueza e emprego ao tempo que se coidan os recursos naturais e o medio ambiente da nosa contorna.
Resultado da recuperación destas fórmulas que até hai ben poucos eran as propias dos nosos concellos: o proceso de xeración de riqueza e emprego mantense no tempo.
Na Xornada de Bioeconomía e Economía Circular, celebrada no Casino de Noia, interviñeron María Sagrario Pérez Castellanos, directora xeral de Medio Ambiente, Territorio e Vivenda na Xunta de Galicia; Margarita Fraga, quen forma parte do equipo de desenvolvemento do proxecto Circular Labs; Sergio Arranz, educador social e especialista en innovación social e intervención comunitaria; e Óscar Vales, creador da marca de roupa sostible Vazva e membro da plataforma We Sustainability.
A xornada estivo presentada e moderada pola investigadora e profesora da Universidade da Coruña, Iria Caamaño, e contou tamén coa participación do alcalde noiés, Santiago Freire.
