A Deputación financia 370.000 horas de axuda no fogar nos concellos da provincia, 48.687 no Barbanza

O Boletín Oficial da Provincia (BOP) publicou onte, martes 11 de maio, a concesión definitiva do Plan de Servizos Sociais Comunitarios da Deputación da Coruña, que permitirá financiar 370.000 horas de axuda no fogar nos concellos da provincia, 77.000 máis que o ano pasado.

A Deputación da Coruña reforzou este ano todos os seus programas sociais para facer fronte aos efectos da pandemia. O orzamento da área social da Deputación experimenta este ano unha importante suba do 137% “para non deixar a ninguén atrás na saída da crise”, segundo explica o presidente, Valentín González Formoso, que destacou que os SAF “son un servizo esencial para garantir a atención aos maiores e dependentes nos concellos máis pequenos”.

O Plan de Servizos Sociais Comunitarios suma este ano un investimento de 8 millóns de euros que tamén permitirán crear 179 empregos de persoal especializado en asuntos sociais nos concellos. A deputada de Benestar Social, Ana Lamas, incidiu en que “ademais, a través desta liña articúlanse as axudas a familias con escasos recursos, os programas de conciliación ou respiro familiar e o financiamento dos servizos de axuda no fogar (SAF) dos concellos.

370.000 horas do SAF e 179 empregos creados

No caso dos municipios de Ferrolterra, a Deputación financia este ano 95.127 horas de axuda no fogar e contrata a 33 profesionais, entre persoal técnico e administrativo, que traballará exclusivamente nas áreas Benestar Social dos municipios da zona.

Na comarca de Santiago a Deputación financia este ano 88.688,51 horas de axuda no fogar e contrata a 50 profesionais.

Para os concellos de Bergantiños a Deputación financia este ano 74.593,43 horas de axuda no fogar e contrata a 35 profesionais.

Na área da Coruña a Deputación financia este ano 61.456,01 horas de axuda no fogar e contrata a 40 profesionais.

No Barbanza a Deputación financia este ano 48.687,07 horas de axuda no fogar e contrata a 21 profesionais.

Aportación insuficiente da Xunta

Con este programa, a Deputación quere estar preto da xente que máis o necesita e ofrecer á cidadanía contar uns servizos sociais profesionais e de calidade, independentemente do lugar onde vivan”, afirmou Valentín González, que destacou que a achega da Deputación para financiar os servizos de axuda no fogar é un 20% superior ao que dispón a Xunta de Galicia a pesar de ter as competencias na área social.

“Pagamos 12 euros/hora fronte aos 9,7 euros/hora da Xunta de Galicia que mantén conxelada a súa achega desde 2016, o que ocasiona unha importante carga económica para os concellos, xa que non cubre nin a metade do prezo dun servizo que a día de hoxe costa arredor de 18 euros/hora, o que obriga aos concellos a asumir a outra metade”, afirmou.

“Os profesionais que a Deputación axuda a contratar son os que buscan solucións aos problemas diarios das persoas máis desfavorecidas ou que atravesan situacións difíciles, os que atenden nas casas aos maiores e dependentes”, explicou a deputada de Benestar Social, Ana Lamas, que destacou que moitos municipios viron incrementada a carga de traballo do seus servizos sociais debido á crise provocada pola Covid-19.