A Deputación da Coruña e os nosos concellos dan o empurrón definitivo ao proxecto do Parque da Idade de Ferro

Os nosos concellos queren ser un referente no turismo vencellado á historia e á arqueoloxía: un turismo sustentábel que actúe, directamente, en beneficio do noso rico patrimonio e a súa conservación. Estes son algúns dos alicerces do proxecto de creación do Parque Arqueolóxico da Idade de Ferro, que recibiu este 10 de maio o seu empurrón definitivo da man dos concellos implicados (Porto do Son, Boiro, Ribeira, A Pobra do Caramiñal e Rianxo).

Os responsábeis dos Gobernos municipais participaron na formalización do acordo que vai servir de marco de traballo ao dito proxecto, xunto co presidente e vicepresidente da Deputación da Coruña, Valentín González Formoso e Xosé Regueira, respectivamente. Segundo fixeron saber, amais de poñer en valor os recursos históricos do Barbanza e impulsar o turismo “cultural e de calidade”, tamén se favorecerá a cooperación institucional.

O alcalde de Boiro, José Ramón Romero García; o alcalde da Pobra do Caramiñal, Xosé Lois Piñeiro García; o de Rianxo, Adolfo Muíños; o de Ribeira, Manuel Ruíz Rivas e o concelleiro de Porto do Son, Juan Pouso e o vicepresidente e deputado de Turismo da Deputación da Coruña, Xosé Regueira, coincidiron en salientar o acordo como “o paso definitivo para o impulso dunha iniciativa de especial interese patrimonial, cultural e turístico do territorio da Arousa Norte e a Barbanza”.

No caso do Parque da Idade de Ferro, o Castro e Isorna, en Rianxo; os de Neixón e de Achadizo, en Boiro; o de Croa de Postmarcos, na Pobra do Caramiñal, e o Castro da Cidá, en Ribeira, son algúns dos recursos dun proxecto que terá identidade propia coa posta en valor do patrimonio vinculado á Idade de Ferro. Así, o proxecto desenvolverá, entre outras, accións de protección e sinalización de recursos, deseño e realización de rutas ademais de implementación de novas ferramentas para a súa difusión.

Regueira salientou as similitudes con outros proxectos nos que a área que dirixe está a traballar en colaboración directa cos municipios do territorio como son o Xeoparque de Ortegal, o Parque do Megalitismo da Costa da Morte ou Compostela Rupestre.

“Con este plan da Deputación imos conseguir que a Idade de Ferro se converta en ouro puro na nosa comarca”, sinalou o alcalde de Ribeira, Manuel Ruíz Rivas mentres o alcalde de Boiro, José Ramón Romero García destacaba o “patrimonio como valor engadido ao turismo na comarca do Barbanza” e facía fincapé na colaboración institucional á hora de defender o proxecto.

“Queremos mostrar a nosa satisfacción por materializar o convenio e o impulso que supón á difusión e promoción dos monumentos castrexos da nosa comarca que queremos facer un dos eixos vertebradores do turismo cultural e histórico”, apuntou o alcalde de Rianxo, Adolfo Muiños ao tempo que o responsábel da Pobra do Caramiñal, Xosé Lois Piñeiro García, consideraba que a iniciativa é “unha oportunidade para poñer en valor o patrimonio e dálo a coñecer á cidadanía”. No acto participou tamén o concelleiro de Porto do Son, Juan Pouso, municipio que asume a primeira presidencia do Parque Arqueolóxico da Idade de Ferro.

O obxectivo da comunidade intermunicipal é, segundo se sinala no texto do acordo, a “posta en valor do patrimonio arqueolóxico existente nos respectivos termos municipais, no marco das competencias propias que lle corresponden en materia de promoción económica, desenvolvemento territorial e turismo”. A xestión estará dirixida por un Consello de Dirección do que formarán parte dous representantes da Deputación e dous de cada unha das corporacións participantes. O convenio ten unha vixencia por catro anos, con posibilidade de prorrogalo a outros catro.