A Asociación de Empresarios de Ribeira puxo remate ás actividades da Campaña Día da Nai 2021, que se encamiñaron a dinamizar o comercio local e a recoñecer e premiar a fidelidade das veciñas e veciños que apostan polos establecementos de proximidade. A campaña tivo o seu punto central nun sorteo dirixido a todos os clientes que mercasen ou consumisen nos establecementos asociados participantes na iniciativa. O sorteo realizouse o pasado luns 3 de maio e, finalmente, fíxose entrega na mañá deste 10 de maio do premio á persoa gañadora, na sede da Asociación de Empresarios. A veciña gañadora foi María Queiruga, que recolleu o seu vale para gastar nos establecementos participantes.
Na campaña deste ano participaron 1.278 clientes, unha cifra que en palabras da asociación foi “todo un éxito” e un exemplo de implicación cidadá cos seus comercios e establecementos.
Segundo fixo saber o presidente da asociación, Francisco Martínez Gude, o “obxectivo fundamental da campaña foi incrementar as vendas e incentivar o consumo no pequeno comercio retallista e hostalería de Ribeira”.
O vale foi entregado a María Queiruga polo presidente da entidade empresarial de Ribeira e o concelleiro de Promoción e Dinamización Económica, Ramón Doval.
O premio
O premio desta campaña consistiu nunha tarxeta bancaria con un importe de 1.000€ menos a retención dos impostos obrigatorios, o asesoramento dun/unha personal shopper e un coche con chofer para levar á persoa agraciada aos establecementos que elixa para gastar o premio. Este ten que ser gastado o día 29 de maio nos establecementos participantes. O importe deste premio deberá ser investido nos tres sectores que participan nesta campaña: comercio, hostalería e restauración. Para repartilo entre varios participantes, como máximo a persoa premiada pode gastar 150€ en cada un dos establecementos seleccionados para gastar o premio.
