A Asociación Francisco Lorenzo Mariño, un ano máis, presenta os actos da Semana Cultural na que pretenden divulgar a nosa cultura, identidade e tradición a través da décimo sétima edición deste evento tras tres lustros de historia da entidade. Desta maneira conmemoran o pasamento de Don Francisco como a el mellor lle gustaría, “enxalzando a música, o teatro e a historia do noso pobo e a unión da nosa xente”.
Esta proposta está pensada para todas e cada unha das persoas que conformamos a parroquia de Aguiño e queren que se sintan reflectidos nas actividades todos os grupos de idade, por elo, programamos eventos onde grandes e cativos teñamos un espazo que ocupar; coa contada de Candido Pazó, a maxia de Román, a música tradicional de As 7 Linguas e as conferencias sobre o Centenario do afundimento do Santa Isabel artellan un programa diverso e atractivo para o público en xeral.
Dende a directiva agradecen a todas as persoas, empresas, entidades e institucións a colaboración prestada o longo de todos estes anos, xa que sen eles esta andaina non sería posible. Nesta ocasión decidiron dedicar a xornada cultural inaugural á efeméride da traxedia do Santa Isabel e o comportamento heroico das veciñas e veciños de Sálvora en particular e Aguiño e Ribeira en xeral naquela noite aciaga na que perderon a vida 213 persoas dos 266 tripulantes que transportaba o vapor correo da compañía transatlántica. Un recoñecemento público ás heroínas e o resto de veciños da illa que esa noite arriscaron a súa vida en favor dos demais e conseguiron salvar a 53 persoas.
