A Pobra permanece pechada a pesar dos seus bos datos e denuncia a “discriminación” da Xunta: “É inxusto” di o alcalde.
O Concello da Pobra do Caramiñal advirte ao comité clínico que non acatarán as súas decisións e que farán o necesario “para que rectifiquen canto antes”.
A Pobra do Caramiñal permanece pechada como O Grove, Cualedro, Carballeda de Valdeorras e Vilanova de Arousa, que estrea o nivel máximo de restricións esta fin de semana. Con todo, os datos na Pobra hai días que non son tan malos e onte os veciños asistiron decepcionados a como desde a Xunta non realizaban ningún tipo de modificación na súa situación.
Desde o goberno municipal critican que, a pesar da melloría substancial do municipio, que se atopa xa por baixo dos nove casos activos na cifras semanais e en nivel medio, a Xunta aínda mantén pechada a hostalería da localidade, coas consecuencias económicas que iso supón, e o peche perimetral do municipio.
O alcalde pobrense, Xosé Lois Piñeiro a través da súa conta de facebook escribiu :
Hoxe baixamos a 23 casos diagnosticados nos últimos 14 días, a incidencia acumulada sitúase en 246. Xa estamos no rango entre 150 e 250, que corresponde non xa a nivel de restrición alta, senón ao nivel de restrición media, e sen embargo seguimos no nivel de restrición máxima.A sete días temos unha incidencia acumulada entre 25 e 75, o cal significa que houbo entre 3 e 6 casos diagnosticados na última semana. Estes datos xa se corresponden cun nivel de restrición media baixa, é dicir, o máis baixo que hai. Os datos son moi favorables e temos motivo para a ledicia e a esperanza.Sen embargo o feito de que sigamos en nivel de restrición máxima non me permite sentimento positivo ningún. É inxusto. O noso concello non é o responsable do gromo que apereceu aquí, nin temos que pagar por iso. As explicacións recibidas onte non convencen. O noso concello está a recibir un trato discriminatorio e non o imos aceptar.Agora non queda máis remedio que esperar ao martes, aínda quedan días para seguir valorando a evolución do noso concello, pero que quede claro que non aceptamos a decisións tomadas polo comité clínico e faremos o que estea na nosa man para que rectifiquen o antes posible. Así que hoxe máis ánimo que nunca.
