O BNG de Ribeira vén de rexistrar unha nova iniciativa para demandar maior mantemento, seguridade, limpeza ou investimentos nos portos do concello de Ribeira. Os nacionalistas xa reclamaron no pasado a Portos de Galicia actuacións nos peiraos de Corrubedo, Palmeira, Aguiño e Ribeira.
O motivo principal polo que se demanda unha revisión dos portos é, segundo apuntan, “o mal estado no que se atopan moitas destas zonas”. Nalgúns casos, indican, trátase de farois fóra de servizo, conexión eléctricas rotas, escaleiras de acceso enferruxadas ou a cantidade considerábel de lixo que moitas veces remata no mar.
O concelleiro Pérez Barral explica que Portos de Galicia debería manter en boas condicións as instalacións portuarias “tanto por ser unha zona de traballo para os mariñeiros como por ser zonas de uso público para a veciñanza”. Por isto, o BNG exixe ao Concello de Ribeira que inste a Portos de Galicia a manter en boas condición as instalacións, ademais de tentar trasladar as demandas e necesidades do sector pesqueiro ao Parlamento de Galicia.
