O Bloque Nacionalista Galego de Noia vén de rexistrar iniciativas a prol dos núcleos de Barro e Couto. Nelas solicitan “a posta en valor” do Couto e unha estratexia efectiva para mellorar a calidade de vida da veciñanza deste núcleo histórico noiés. No caso de Barro rogan ao Goberno local o arranxo da estrada na Horta da Zapateira, que presenta buracos como o que se aprecia na imaxe.
O Couto
Indican os nacionalistas “a importancia patrimonial do barrio de O Couto”, feito probado pola inclusión da Ponte de Traba e a súa contorna na área de protección do Plan Especial de Protección e Reforma Interior do Casco Histórico (PEPRICH) e pola consideración PXOM pendente de aprobación definitiva da necesidade de desenvolver un Plan especial de protección, ordenación e infraestrutura e dotación para o ámbito do Núcleo Rural Histórico de Ponte de Traba – O Couto.
“A tardanza que está sufrindo a aprobación definitiva do PXOM”, sinala o BNG, “obriga a que o Concello realice actuacións que eviten o abandono da veciñanza”. Deste xeito propoñen actuacións como “a conversión do abandonado colexio de Atenea nun centro sociocultural”, “a apertura do parque do Monte do Bolo”, “a posta en marcha das intervencións recollidas no PEPRICH para a contorna da Ponte de Traba”, “a restauración de elementos patrimoniais”, “o remate das deficiencias no saneamento” ou “a mellora da seguridade viaria no lugar”.
Barro
Polo que respecta ás peticións relativas a Barro, o portavoz da formación nacionalista, Ricardo Suárez, quixo reflectir as demandas das veciñas e veciños do lugar da Horta da Zapateira e reclamou, en base a estas queixas, “a intervención seria sobre o pavimentado da estrada nesa localización”. E engadiu: “A estrada da Horta da Zapateira sofre de afundimentos do firme dende hai moitos anos e os parches realizados dende a Administración local non acadan unha solución axeitada”.
