No Son celébrase en maio un curso online e gratuíto para operadoras/es de produtos pesqueiros frescos

O Concello de Porto do Son vai activar o vindeiro mes de maio unha actividade formativa destinada a fortalecer as actividades produtivas ligadas ao mar ao tempo que se mellora a empregabilidade da veciñanza ao abeiro dos sectores pesqueiro e marisqueiro. Trátase do Curso Online de Operador/a e Manipulador/a de Produtos Pesqueiros Frescos, unha iniciativa formativa de 35 horas de duración que vén cos engadidos extra de ser de balde e de vir incluída no catálogo de capacitación puntuábel no baremo de marisqueo (as persoas participantes obterán 0,70 puntos).

Segundo explica o Concello, poderán participar neste curso as persoas empadroadas no termo municipal de Porto do Son, para o cal é necesario enviar a correspondente solicitude (xunto cunha copia do DNI) a jose.pazo@portodoson.gal. O prazo de inscrición estará aberto ata o 22 de abril, ás 14.00 horas. Achéganse un total de 20 prazas, que serán asignadas por sistema de sorteo.