O borde portuario de Porto do Son está a ser obxecto dende hai meses dunha importante remodelación, impulsada dende Portos de Galicia e o Concello coa finalidade de recuperar a estreita relación que a vila mantiña co mar, apostando firme pola humanización, a accesibilidade e a prioridade para os peóns. O proxecto, como lembraremos, ten un orzamento de 4 millóns de euros. A superficie na que se realizan as obras é de 26.000 metros cadrados.
En palabras do Concello, o obxectivo desta iniciativa consiste en “humanizar o borde portuario, abrindo ao mar a villa”. Así, pódense apreciar os traballos, que xa comezaron a finais do verán pasado. Dende entón, colocáronse as canalizacións, o cableado eléctrico e as redes para as augas residuais. De feito, un dos asuntos máis importantes que se realizou foi a separativa.
O alcalde sonense, Luis Oujo Pouso afirmou que “Porto do Son é un concello turístico e non quere que nada poida contaminar as augas, non só polo turismo, senón tamén pola pesca e o marisqueo”.
Segundo puidemos saber, despois desta Semana Santa comezará a creación da rotonda coa que se pretende ter o acceso ao peirao antes do verán. Concretamente, en xuño, debería estar rematada a franxa marítima pegada aos edificios, para proseguir coa área próxima ao porto. Do mesmo xeito, crearanse nos próximos meses edificios de servicios náuticos e portuarios.
