Este mércores convocadas concentracións en Rianxo e Ribeira para esixir que se reactive a atención sanitaria presencial

Promovidas polas plataformas SOS Sanidade Pública, este mércores pola tarde, ás 20.00 horas, están previstas concentracións que na comarca, serán en Ribeira e Rianxo, e a súa finalidade principal é reclamar que se reactive a atención presencial nos centros de saúde e que se incremente o persoal, acabando coa precariedade e a inestabilidade dos profesionais.

No caso da concentración convocada na vila rianxeira que será ás 20.00 horas ás portas do centro médico da Martela, a iniciativa está apoiada polo grupo político Rianxo en Común ( ReC) e engadíronse ás reivindicacións unha serie de cuestións particulares que afectan á atención sanitaria no municipio. En concreto, demándase cobertura das ausencias por descanso ou vacacións dos médicos, especialmente no caso dos profesionais de pediatría, de maneira que se garanta a atención no centro de saúde sempre.

Outra das reivindicacións é a de contar cunha matrona a tempo completo, así como a vella demanda de que se habilite un servizo de urxencias polas tardes e que se amplíe a Rianxo a cobertura do servizo de hospitalización a domicilio. En canto a Ribeira, a concentración será á mesma hora na praza do Concello e, entre as medidas concretas que se reivindican, ademais da reactivación da atención presencial nos centros de saúde fronte á telefónica, inclúese o rexeitamento á reforma da Lei Galega de Saúde e a posta en marcha dun plan para afrontar as listas de espera acumuladas.