Co gallo do Día do Libro (este 23 de abril), a Deputación da Coruña e o Concello de Rianxo van organizar un espectáculo teatral para conmemorar “en vivo” as nosas letras e a nosa cultura. Farano o 24 de abril, coa representación de Libre coma os paxaros – Manifesto rebelde, de Teatro do Atlántico. A cita será o sábado ás 20.30 horas na Sala Arcos Moldes do Auditorio Municipal.
Argumento
Unha muller toma a palabra e proclámase posuidora da súa liberdade. Declara, desafiante, non someterse ás regras da arte no exercicio da súa actividade creativa, nin acatar mandatos dos seus iguais.
Declara o seu amor pola literatura, a poesía e a lingua do seu país; o seu respecto e admiración polas escravizadas mulleres do seu pobo; e expresa a súa solidariedade e a súa dor polas miserábeis condicións de vida que aquelas teñen que soportar.
Denuncia o espolio do patrimonio forestal, a traxedia da emigración á que se ven obrigados centos de miles de compatriotas para poder sobrevivir, eles e as súas familias, á fame e á miseria. E clama contra o silencio que todo o envolve.
Muller. Filla de nai solteira. E de pai cura. Escritora. E poeta. Galega de pensamento libre. Libre coma os paxaros.
Chámase María Rosalía Rita de Castro.
Só con reservas
Á obra só se poderá acudir con reserva de localidades a través da páxina web do Concello de Rianxo ou no teléfono 981 100 688, do 17 ao 23 de abril, de 9:00 a 13:30, en días laborais. É necesario indicar, de todas as persoas para quen se solicita: nome completo, teléfono e se as persoas que formalizan a reserva viven baixo o mesmo teito. A reserva será efectiva unicamente cando se confirme desde o Auditorio.
