O concelleiro de Turismo, Raúl Treus, mantivo este 12 de abril unha xuntanza telemática con responsábeis dos aloxamentos turísticos locais para preparar o traballo conxunto da revitalización do sector nesta tempada primavera-verán e sentar os alicerces de vindeiras colaboracións en materia turística. Na xuntanza estivo presente tamén o persoal técnico do departamento de turismo.
A sesión foi a primeira toma de contacto entre os propietarios e xerentes dos diferentes establecementos turísticos do termo municipal (pensións, hoteis, establecementos de turismo rural, cámpings). O responsábel municipal expuxo as directrices de traballo para futuro e as liñas de traballo que se van implementar, “que pasan por potenciar un turismo de calidade, sustentábel e dixital”, indicou.
O persoal técnico do departamento presentou tamén algúns dos proxectos nos que se está a traballar dende o Concello, para adaptar as iniciativas de promoción turística ás restricións actuais derivadas da situación sanitaria.
Os responsábeis dos establecementos expuxeron tamén as inquedanzas e necesidades do sector neste momento.
As dúas partes, Concello e empresas, acordaron manter o contacto e determinar liñas de traballo conxuntas polo impulso do turismo de calidade no municipio e a recuperación económica do sector.
