A Deputación da Coruña e o Concello de Boiro veñen de confirmar a vindeira execución dunha nova vía que conecte as estradas provincias DP-1106 e DP-1107, unha conexión destinada a mellorar as comunicacións entre Cabo de Cruz e Abanqueiro coa saída de Boiro, así como tamén a seguridade viaria nunha contorna de moita afluencia de tráfico e viandantes.
A actuación suporá a execución dunha nova unha variante que una as estradas provinciais DP-1106 de Boiro a Cespón coa DP-1107 de Boiro a Cabo de Cruz e que “permita desviar o tráfico pesado por esta nova estrada, evitando así que se concentre no centro urbano de Boiro”, explicaron as dúas entidades, engadindo que para buscar unha solución estudáronse tecnicamente tres alternativas moi similares que se diferencian, fundamentalmente, na intersección coas estradas provinciais.
O presidente da Deputación da Coruña, Valentín González Formoso, salientou a “importancia que ten para a Deputación esta infraestrutura estratéxica que une estas dúas estradas de zonas moi poboadas de Boiro”. E engadiu: “Vai a ser unha obra con certa complexidade técnica porque require de permisos e autorizacións de distintas administracións, pero é sobre todo un investimento de futuro tendo en conta as novas bolsas de chan industrial que quere conectar o Concello de Boiro”.
O alcalde de Boiro, José Ramón Romero, destacou tamén a relevancia da conexión, moi demandada pola veciñanza de Boiro: “É unha vía de saída a toda a industria de Cabo de Cruz para evitar que o tráfico pesado, e tamén o tráfico lixeiro, vaian ao centro urbano de Boiro”.
A actuación contempla tamén unha vía peonil e un carril bici que, como explicou o alcalde, “vén a unirse co que temos no paseo marítimo”. Romero estimou que as obras comezarán a executarse este mandato, cumprindo así un dos principais compromisos do seu Goberno municipal.
A obra consistirá na execución dunha vía de 950 metros de lonxitude que une entre si as estradas que van de Boiro a Cabo de Cruz e de Boiro a Abanqueiro. A variante contará cunha plataforma de 9 metros de ancho, con dous carrís de 3,5 metros cada un e beiras laterais de 1 metro. A proposta inclúe tamén a execución dun carril bici de 2,5 metros de ancho, ademais dunha mediana que o vai separar do carril de circulación e no que se vai colocar o alumeado. Para a intersección desta estrada coas outras circundantes estúdase a opción que contempla a execución de glorietas en ambos casos, axudando a unha mellor regulación do tráfico.