Comezan os traballos para acondicionar a praia dos Areos, na Pobra

Na mañá deste 15 abril comezaron os labores de acondicionamento da praia dos Areos, na Pobra, os cales terán continuidade este venres 16. Segundo explica a concelleira dos Servizos Municipais, Estefanía Ramos (Nós Pobra), trátase dunha actuación “moi necesaria” debido a que as mareas e os temporais fan que a area se acumule na zona máis próxima ó porto, polo cal se produce unha descompensación respecto ó resto do areal.

A dita intervención conta coa autorización de Costas e, segundo informou a edil, “consiste na redistribución do sedimento ó longo da área supramareal da praia coa finalidade de acondicionala para a tempada estival e tamén eliminar os problemas que se estaban a producir nos días de temporal cando a area chegaba a acumularse no paseo que discorre pola contorna”.

A empresa que está a realizar estes traballos é Tragsa, mediante un contrato de prestación de servizos por un importe de 11 888’14 euros, IVE incluído, con cargo ó orzamento municipal.

O Concello fixo saber que “debido a estas tarefas, tanto hoxe coma mañá está prohibido aparcar na rampla do recheo, ademais de que se pode producir algún corte puntual do tráfico na estrada paralela ós Areos”.