Cinco novas rúas en Ribeira e Aguiño súmanse á peonalización

Este 7 abril reunise a mesa da peonalización de Ribeira, presidida polo alcalde Manuel Ruíz, co fin de analizar diversos asuntos relacionados coa mellora da mobilidade no municipio. Así, aprobouse que cinco rúas e tramos de rúa situadas nas localidades de Ribeira e Aguiño adquirirán carácter peonil ou semipeonil.

En primeiro lugar atópanse as que se lles conferirá carácter peonil. Por un lado está a rúa Mendiño, situada xunto á praza de España de Ribeira, así como o final da rúa Franciso Lorenzo Mariño en Aguiño, no tramo que descorre pola parte posterior da Casa do Mar.

Tamén se acordaron as vías que adquirirán un carácter semipeonil, que prioriza o tránsito dos viandantes pero permitindo a circulación de vehículos a unha velocidade reducida. A rúa Romero Ortiz e a parte superior de Rosalía de Castro ata a rotonda da Serea serán os treitos situados en Ribeira que pasarán a ser de carácter semipeonil. Ademais, a rúa Castelao en Aguiño tamén se lle aplicará esta condición.

A reunión tamén serviu para anunciar que o rescate da concesión do estacionamento do Centenario por parte do Concello está á espera da firma do acordo. Tamén se determinou que a rúa da Cruz e a rúa das Américas de Aguiño pasarán a ser de dirección única co fin de aumentar a fluidez do tráfico e crear prazas de aparcamento. Mentres tanto, un tramo de Pinisqueira e Luis Pimentel permitirá o dobre carril.