Castiñeiras acolle esta finde unha regata organizada polo Club Catro Ventos

A regata clasificatoria para o Circuíto Galego das clases de Fórmula Windsurfing, Techno 293, RaceBoard e Fórmula Foil terá lugar este fin de semana na praia de Castro, en Ribeira. O acontecemento está organizado polo Club Windsurf Catro Ventos, a Real Federación Galega de Vela e a Secretaría Xeral para o Deporte e a Fundación Deporte Galego, en colaboración co Concello de Ribeira.

Segundo o presidente do club de vela, Juan Parada, “a día de hoxe o certame conta con 27 inscritos aínda que non se descarta que se anote algún máis”. As probas desenvolveranse no formato clásico: de barlovento a sotavento. Así, a primeira realizarase o sábado ás 14:00 horas, mentres que o domingo farase ás 10:00 horas.