A directora xeral de Administración Local, Natalia Prieto, estivo este venres 30 de abril en Noia para comprobar o resultado das obras de melloras levada a cabo no parque infantil de Labarta, ás que o Goberno galego achega preto de 28.000 euros.
Segundo indicou a directora xeral, o Concello solicitou esta axuda co obxectivo prioritario de “continuar prestando os debidos servizos aos cidadáns en condicións de calidade que satisfagan as súas necesidades”. Segundo lle transmitiu no seu día o Goberno local, o parque da zona de Labarta é un dos que rexistra máis afluencia de nenos e nenas, polo que se tomou a decisión de solicitar unha axuda para a colocación dunha pérgola metálica cuberta que ampare das condicións metereolóxicas a contorna de xogos do parque infantil.
Prieto lembrou que o Concello de Noia nos últimos once anos ten recibido axudas da Vicepresidencia cun importe de máis de 770.000 euros destinados a proxectos beneficiarios da Orde de Infraestruturas, do Fondo de Compensación Ambiental, ademais da adquisición de vehículo de emerxencias e melloras no Consistorio.