SEA autoriza venda nos polígonos de Rianxo e Vilanova

A entidade Solo Empresarial do Atlántico (SEA) vén de autorizar novas vendas en Vilanova e Rianxo, nun consello trimestral con operacións de case tres millóns de euros e cifras que, segundo informou a entidade, “baten records”.

A xerente de SEA, Beatriz Sestayo e o director xeral de SEPES, Lucrecio Fernández, participaron este 29 de marzo no consello de administración da entidade, no que se aprobaron por unanimidade as ditas operacións marca (que supoñen, en total, a mobilización de 60.317 metros cadrados en tan só tres meses).

En concreto, autorizáronse operacións nos polígonos de Monforte de Lemos e Rábade (Lugo); da Laracha, Cee, Vimianzo, Muros e Rianxo (A Coruña) e en Vilanova de Arousa (Pontevedra).

O caso de Rianxo

No balance deste 29 de marzo lembrouse que este primeiro trimestre do ano reflectiu para SEA a consolidación para impulsar o Polígono de Rianxo, que pasou en apenas dous anos do 15% de ocupación a preto do 70%.

En concreto, pechouse a venda de dúas novas parcelas a Conservas Cerqueira, titulares tamén da marca Pay Pay, por un importe de 727.524 euros máis IVE (11.548 metros cadrados en total) e que se suman aos case 25.000 m2 adquiridos pola compañía en 2020, que ten previsto construír na localidade unhas novas e modernas instalacións, nas que empregue a preto de 400 persoas.