O PSdG-PSOE emitiu un breve comunicado no que insiste na necesidade de mellorar as instalacións deportivas de Aguiño situadas na Tasca, cuxa pista multideporte foi danada polo temporal Karim.
Os socialistas presentaron un rogo no pleno para que se levasen a cabo as debidas reparacións e acondicionamentos, pero, segundo critican, aínda están pendentes de facerse. O grupo tamén puxo o foco na necesidade de arranxar as catro torres de alumeado ou as estruturas de suxeición das redes dos fondos sur e norte.
Ao abeiro do rogo o grupo socialista solicitou no seu día que “por parte de quen corresponda se proceda a valorar o necesario saneamento e pintado das torres, que xa foron causa dalgún incidente anterior, e máis da estrutura de ferro que sostén as redes dos fondos do Campo de Fútbol Municipal da Tasca”.
