O libro Aproximacións a Manoel Antonio preséntase en Rianxo o 18 de marzo

Finalmente, logo dunha primeira convocatoria en xaneiro que tivo que ser cancelada por mor dun intre especialmente crítico da pandemia, este 18 de marzo (ás 20.00 horas) vaise presentar no Centro Sociocultural-Auditorio de Rianxo a obra Aproximacións a Manoel Antonio de Xosé Luís Axeitos. A actividade enmárcase no eixo dos Actos Castelao 2021 do Concello.

Na apertura e no peche do acto tocarán dous músicos da Escola de Rianxo, Sara García Alcalde co seu clarinete e máis Félix Iago Rodríguez Ramos acompañado do seu bombardino. Ademais do autor, tamén acudirán á celebración María Xesús Blanco, vicepresidenta da Asociación Cultural Barbantia, Roberto Abuín, de Axóuxere Editora e Adolfo Muíños, alcalde de Rianxo. Tamén está previsto que se leve a cabo unha intervención plástica en directo a cargo do artista Xosé Luís Veiras Manteiga.

Todas aquelas persoas que queiran acudir, deberán reservar a entrada de balde a través do correo do Auditorio de Rianxo, auditorio@concelloderianxo.gal, ou ben no teléfono 664 183 217 (até o 17 de marzo). A reserva será efectiva unicamente cando se confirme desde o auditorio.