O traballo realizado pola Asociación Amigos do Camiño do Barbanza e Arousa, logrou que ” A Orixe” o percorrido inspirado no traslado dos restos do Apóstolo Santiago que parte de Corrubedo para entroncar en Padrón co trazado portugués ata alcanzar a catedral, conseguira o recoñecemento por parte da Igrexa, de forma que os peregrinos que o completen poderán obter a Compostela.
O presidente da Asociacón, Manuel Mariño Nim, e o vicepresidente, Manuel Antonio Villar, que é o arcipreste de Posmarcos de Abaixo, recibiron a confirmación no transcurso dunha reunión co delegado das peregrinacións, Segundo Pérez López, tras facerlle entrega da documentación histórica sobre o trazado e os pasos que se están dando para poñelo ao dispor do público.
O presidente da Asociación Amigos do Camiño do Barbanza e Arousa explicou que a obtención deste recoñecemento por parte da Igrexa é un paso decisivo para impulsar o percorrido bautizado como A Orixe. Trátase dun trazado deseñado para a súa realización en seis etapas, o que segundo Mariño Nim, supón unha vantaxe con respecto a outros roteiros.
A asociación pretende agora seguir traballando para poñer en valor o trazado e tratar de optar nun futuro próximo á oficialización da Orixe por parte da Xunta de Galicia.
