Rosana Pérez, a deputada do BNG, e Anxo Moledo, o portavoz da formación en Lousame, visitaron o río Pesqueira en Lousame para visualizar os problemas fluviais, derivados do abandono dos leitos na localidade. Segundo subliñaron, neste río “pódense apreciar diversas acumulacións de ramallos e follaxe nas balsas, que rematan por alterar o leito e fan que o río gañe terreo ás fincas onde os veciños realizan a actividade agrícola”.
Moledo sinalou que “este problema foi derivado ao concello pero a solicitude de actuación foi ignorada polo goberno local”. Do mesmo xeito, Pérez afirmou sentirse “asombrada polo total abandono do leito e as importantes consecuencias que ten sobre as fincas particulares” e explicou que “no caso de non atender nin concello nin administración galega a esta demanda da veciñanza afectada, será o BNG quen tomará a iniciativa no parlamento”.