Ribeira foi escenario dun novo acto reivindicativo por parte do BNG para exixir a rebaixa inmediata nas portaxes da AP-9. A deputada do BNG no parlamento galego, Rosana Pérez, estivo acompañada do alcalde rianxeiro, Adolfo Muíños, os concelleiros Xosé Vázquez, Luís Pérez , Carlos Ansoar e o membro do Consello Comarcal Manel Casal.
A deputada nacionalista avanzou que a colocación de faixas está enmarcada dentro da campaña social Basta de aldraxe a Galiza, e explicou que se levarán a cabo caravanas automobilísticas para facer que o goberno estatal cumpra co pactado. “Hai que rematar coa estafa legalizada que supón as portaxes da AP-9 e tamén co agravio que implica que teñamos unha das autoestradas máis caras do Estado”, afirmou Rosana Pérez.
Por outra parte, os nacionalista explicaron que “non hai razón ningunha para que se siga demorando a aplicación das medidas previstas nos Orzamento do Estado para evitar subidas previstas nos convenios de 2011 e 2013 ou a gratuidade dun tramo como é o caso de Vigo-Redondela”. Ademais, Pérez Fernández criticou a inacción do
Goberno do Estado coa sociedade galega xa que “os galegos contribuímos a pagar tamén cos nosos impostos o rescate das radiais madrileñas eu que o Goberno Español racanee 55 millóns de euros para pór en marcha estes descontos da AP-9”.
Dende a sede bloquista indican que manter as tarifas actuais da AP-9 supón un grave lastre para “moitas familias da Barbanza que teñen que empregar a autoestrada tódolos días por motivos laborais”. Ademais recordaron que a Barbanza é unha bisbarra profundamente industrial e as abusivas peaxes supoñen unha perda na
competitividade das empresas.
