A favorábel evolución da COVID-19 nos últimos días na comarca permitiu levar a cabo unha desescalada que afectou a moitos ámbitos, entre eles o do deporte. Ribeira, no terceiro nivel, procedeu a apertura de recintos deportivo e ximnasios, coa excepción da Piscina Municipal, situación que reclaman cambiar dende o BNG.
Os bloquistas de Ribeira instan, deste xeito, ao Concello de Ribeira a abrir a piscina municipal con garantías sanitarias tras doce meses pechada. “En moitos municipios da contorna como Rianxo, Porto do Son ou Outes, permiten a práctica deportiva nas súas piscinas dunha maneira segura”, explica o concelleiro, Luis Pérez Barral.
A necesidade de potenciar os hábitos de vida saudábeis nos cidadáns é o principal argumento do BNG para reabrir a piscina, pois destacan que “a natación é un deporte moi beneficioso pois produce baixo impacto nas articulacións fronte a outros deportes e mellora o sistema circulatoria e incrementa a capacidade pulmonar”.
O BNG reclama apertura da piscina municipal para antes de que finalice o mes de marzo, a través dunhas normas claras que garantan o uso seguro desta instalación por parte da veciñanza, e que o “goberno local debe preparar o protocolo adecuado”. Dende a sede nacionalista porán en marcha unha iniciativa para pedirlle explicacións ao alcalde, Manuel Ruíz, sobre a decisión de non abrir a piscina municipal.
