Na Pobra convócanse obradoiros de conciliación para Semana Santa

A Concellaría de Igualdade da Pobra que dirixe Charo Varela (Nós Pobra) vai organizar os vindeiros días uns obradoiros de conciliación, con vistas a botar unha man ás familias no tempo festivo que se achega o tempo que se poñen en xogo importantes opcións de lecer para a rapazada. Celebraranse os días 29, 30 e 31 de marzo, así como o día 5 de abril. Transcorrerán no CEP Salustiano Rey Eiras, en horario de 09.00 a 14.00 horas, e están dirixidos a crianzas nadas entre 2008 e 2017.

O prezo total é de 15 euros por nena/neno, pero aplicarase un desconto do 50% á segunda irmá ou irmán e será de balde para o/a terceiro/a.

Ademais, inclúe o Servizo de Madruga, cuxo custo será de 4 euros pola entrada do cativo/cativa a partir das 08.00 horas, e de 6 euros dende as 07.30 horas. Tamén haberá a prestación de comedor para dar maiores facilidades ás familias usuarias.

A data límite para a inscrición é no 25 de marzo a través das oficinas dos Deportes do Concello, situadas na casa da cultura e xuventude Raquel Fernández Soler, dende as 09.30 ata as 14.30 horas, cos teléfonos de contacto 981832590 e 981831545.

O Concello explicou que seguirase o protocolo e as medidas implantadas por mor da COVID-19.